Conmovedora novela que mostra o cambio radical na visión do mundo dun cínico escritor tras coñecer de primeira man o drama da inmigración ilegal.

A vida do soado poeta sueco Jesper Humlin é tan regalada como vacua, sumida nunha inanidade apenas salpimentada polas disputas coa súa parella, as envexas dos seus colegas e a présa dos editores. Con todo, talvez Jesper conserve un resto de dignidade ao rexeitar a proposta do seu editor de que escriba novelas policiacas, que venden cincuenta veces máis que a poesía (ata a súa anciá nai púxose a escribir unha!). E quizais ese vestixio de decencia desencadee tamén o seu interese polas vidas dunhas inmigrantes que acoden a unha lectura pública da súa poesía. Grazas a elas, Jesper coñecerá de primeira man as vexacións que sofren aqueles que emigran a Europa en busca, paradoxalmente, de liberdade. Pero, sobre todo, a historia de Tea-Bag, moza africana que lle relata a fuxida da súa aldea, a viaxe cara ao norte –con obrigada «escala» nas costas españolas– e a súa chegada a Suecia, será o que acabe por desasosegar ao fatuo Jesper.

3º-4º ESO